Skip to main content

Community as Opportunity

Riikkaarkiiva lea fárus Eurohpá komišuvnna Community as Opportunity (CO:OP) -prošeavttas, man ráhkadit 17 eurohpalaš arkiivva ja universitehta. Prošeakta ollašuhtto jagiid 2015–2018 áigge.

Veahkki priváhtamateriálaid digitaliseremii

Prošeavttas leat guokte guovddáš oasseviidodaga. Vuosttas mihttomearrin lea álkidahttit priváhtaolbmuid hálddus leahkki arkiivamateriála digitaliserema, juohkima ja guhkálaš seailluheami. 



Dán dárkkuhusa várás Riikkaarkiiva lea skáhppon johtti digitaliserenstašuvnnaid, maid beroštuvvan olbmot sáhttet luoikkahit iežaset atnui. Digitálalaš vuorkkát vurkejuvvojit prošeavtta ásahan Topotehka-vuđđui sihke dárbbu mielde oassálasti orgána iežas vurkengaskoapmái. Topotehkai vuorkkát vurkejuvvojit kártavuđđui, nu ahte buot beroštuvvan olbmot sáhttet oaidnit dihto viidodahkii sajustuvvan čuozáhagaid. Luohpadeaddjit juogo dollet buot vuoigatvuođaid materiálai (goas dan sáhttá dušše geahčadit) dahje ávžžuhusa mielde addet dasa Creative Commons -liseanssa.

Jagi 2016 áigge ollašuhttojedje vihtta digitaliserendilálašvuođa, gosa olbmot bukte čuđiid čuozáhagaid digitaliserema várás, ovdamearkan boares govaid ja áššebáhpáriid.

Lihkostuvadettiin prošeakta čoavdá priváhtaolbmuid materiálaid digitaliseremii ja čájeheapmái gulavaš máŋggaid váttisvuođaid: alladássásaš digitaliseren ollašuhtto prošektii skáhppojuvvon rusttegiiguin, liseansavuogádat lea čielggas, materiála boahtá buohkaide geahčadeami várás báikkálaš Topotehkai ja guhkálaš seailluheapmi ollašuhtto sirdimiin Topotehkaid materiála Europeana-portálai.

Ođđa arkiivavásáhusat eanet olbmuide

Prošeavtta nubbi guovddáš oassi lea nuoraid arkiivavásáhusaid guorahallan ja dain oahppan. Dán dárkkuhusas järvenpäälaš logahatoahppit gallededje Riikkaarkiivvas ja oahpásmuvve iežaset ruoktobáikegotti, soađis gahččan olbmuid historjái arkiivamateriála vuođul. Seammá háve joavku oaččui vuođđodieđuid arkiivvaid fálaldagas ja materiálaid geavaheamis. Prošeakta joatkašuvvá boahtte jagi.

Lassidieđut prošeavttas:

Community as Opportunity -prošeavtta ruoktosiidu

Oktavuođaolmmoš Riikkaarkiivvas: ovddidanhoavda Tomi Ahoranta, tel. 029 533 7004, etunimi.sukunimi@arkisto.fi