Skip to main content

Luohpat iežat priváhtaarkiivva Riikkaarkiivii

Sáhtát priváhtaolmmožin, bearraša dahje soga lahttun dahje organisašuvnna dahje searvvi ovddasteaddjin luohpadit priváhtaarkiivamateriálaid Riikkaarkiivai. Váldit vuostá riikkaviidosaččat dehálaš materiálaid ee. mearkkašahtti politihkkariin ja servodatváikkuheaddjiin, njunuš virgeolbmuin, fuopmášahtti dutkiin ja kulturolbmuin, sierra sektorain váikkuhan sogain ja bearrašiin, historjjálaš gárdimiin sihke riikkadási guovddášorganisašuvnnaid njunušhoavddain. Váldit vuostá maiddái mearkkašahtti servodatáššiid dokumenterejeaddji arkiivvaid.

Váldit vuostá materiálaid dušše skeaŋkan ja dušše dakkár materiálaid, mat gullet Riikkaarkiivva skáhpponpolitihka biirii. Materiálat váldojit vuostá nu čavddis oppalašvuohtan go vejolaš ja ovdamearkan organisašuvnnaid oasil eat dábálaččat váldde vuostá 10 jagi nuorat materiála.

Luohpadeaddjin čatnasat oassálastit materiálaid luohpadanortnegii dahkamis. Vástidat lassin materiála konkrehtalaš doaimmaheamis Riikkaarkiivva dan doaibmabáikái, gosa materiála gehččo gullat. Luohpadeaddjin don galggat duođaštit leat vuoigadahtton luohpadit namuhuvvon materiála. Almmá oktavuođaváldima haga sáddejuvvon materiálat máhcahuvvojit. Mearrádus materiála vejolaš vuostáváldimis eaktuda máŋgii čielggadanbarggu, nu ahte du gánneha ráhkkanit dasa, ahte eat sáhte bargat mearrádusa materiála vuostáváldimis Riikkaarkiivai dakkaviđe.

Dieđut bálvalusas

  • Dábálaš neavvun ja oahpisteapmi leat nuvttá.
  • Viiddes rávvenbarggut meroštallojit konsulteremin. Konsulteren lea álo mávssuvuloš.
  • Vuostáváldon materiála gieđahallamis (ordnemis sihke suddjemis) sáhttet boahtit golut, maid birra luohpadeaddjiin sohppojuvvo ovddalgihtii.
  • Hattit vuođđuduvvet Riikkaarkiivva haddelistui.

Go háliidat skeŋket priváhtaarkiivamateriálaid

  • Váldde oktavuođa Riikkaarkiivai (kirjaamo@arkisto.fi)
  • Muitte muitalit doarvái duogášdieđuid materiálas, maid fálat: gean materiálas lea gažaldat, man áigodagas dat lea, man olu dat lea ja makkár sierralágan oppalašvuođat dasa gullet (omd. reivelonohallan, beaivegirjjit, beavdegirjjit, čuovgagovat, aviisačuhpposat).
  • Go oaččot diehtit, leago Riikkaarkiivva rivttes seailluhanbáiki namalassii du materiálai, sáhtát ráđđádallat luohpadeapmái gulavaš eavttuin, detáljjain ja geavada ordnemiin.
  • Arkiivvaid vuostáválddedettiin vuolláičállo vuostáváldinduođaštus dahje dahkko luohpadansoahpamuš, mas meroštallojit vejolaš geavahanráddjehusat ja materiálai gulavaš eará eavttut.